– Villreinen er under press. Tiltaksplanane er det viktigaste enkelttiltaket regjeringa har for å betre tilstanden for villreinen og snu den negative utviklinga. No startar vi arbeidet med tre nye planar, som bygger på solide faggrunnlag og god involvering av dei som kjenner områda best, seier klima- og miljøminister Sigrun Aasland.
Prosessen skal i hovudsak følge same modell som for dei sju andre nasjonale villreinområda.
Lokale prosjekter med dei viktigaste aktørane i villreinforvaltninga i området skal først utarbeide eit kunnskapsgrunnlag og foreslå konkrete tiltak, i eit såkalla faggrunnlag. For kvart villreinområde er det statsforvaltaren med ansvar for området som leier dette arbeidet. Norsk villreinsenter er sekretariat, og andre aktuelle statsforvaltarar deltar òg. Statsforvaltaren i Møre og Romsdal har ansvaret for Reinheimen-Breheimen, medan Statsforvaltaren i Innlandet har ansvaret for Sølnkletten og Forollhogna.
Statsforvaltarene skal innan 1. oktober 2027 sende faggrunnlaga til Klima- og miljødepartementet. Dette skal danne grunnlaget for departementet sitt vidare arbeid med dei endelege tiltaksplanane.
Medverknad og involvering
– Tiltaka må ha god forankring lokalt. Alle skal få god tid til å gi innspel før regjeringa tar ei endeleg avgjerd. Vi vil legge vekt på brei forankring og eigarskap til tiltaka lokalt og blant påverka aktørar, seier klima- og miljøministeren.
Klima- og miljødepartementet vil gjennomføre vanleg høyring av utkastet til tiltaksplanen, folkemøte og dialogmøte for å sikre breiast mogleg involvering av lokalsamfunn, kommunar og andre aktørar.
Brev frå klima- og miljøminister Sigrun Aasland om tiltaksplanane